ಯೋಗ ಸೂತ್ರಗಳು

*ಯೋಗ ಸೂತ್ರಗಳು*

ಸಮಾಧಿ ಪಾದ

*೫. ವೃತ್ತಯಃ ಪಂಚತಯ್ಯಃ ಕ್ಲಿಷ್ಟಾಕ್ಲಿಷ್ಟಾಃ*

ವೃತ್ತಿಗಳು ಐದು ವಿಧವಾಗಿದೆ. ಕ್ಲಿಷ್ಟ ಮತ್ತು ಅಕ್ಲಿಷ್ಟ.
ಯೋಗಸಾಧನೆ ಮಾಡಬೇಕಾದರೆ ಚಿತ್ತವೃತ್ತಿಗಳನ್ನು ನಿರೋಧ ಮಾಡಬೇಕು. ಚಿತ್ತವೃತ್ತಿಗಳನ್ನು ನಿರೋಧ ಮಾಡಬೇಕಾದರೆ ಅವುಗಳ ಗುಣ ಸ್ವರೂಪಗಳನ್ನು ಅರ್ಥ ಮಾಡಿಕೊಳ್ಳಬೇಕು. ಅಸಂಖ್ಯಾತ ಸಂಖ್ಯೆಯಲ್ಲಿರುವ ವೃತ್ತಿಗಳನ್ನು ಎರೆಡು ಬಗೆಗಳಾಗಿ ವಿಂಗಡಿಸಲಾಗಿದೆ. ಕ್ಲಿಷ್ಟ ಮತ್ತು ಅಕ್ಲಿಷ್ಟ.
ಮನುಷ್ಯನನ್ನು ಅಜ್ಞಾನ, ಅಧರ್ಮ, ನಾಸ್ತಿಕತೆಯ ಕಡೆಗೆ ಕೊಂಡೊಯ್ಯುವ ವೃತ್ತಿಗಳು ಕ್ಲಿಷ್ಟ ಎಂದರೆ ಅವು ದುಃಖವನ್ನು ಉಂಟು ಮಾಡುತ್ತವೆ. ಹಾಗೆಯೇ ಜ್ಞಾನ , ಧರ್ಮ , ಆಸ್ತಿಕತೆಯ ಕಡೆಗೆ ಒಯ್ಯುವ ವೃತ್ತಿಗಳು ಅಕ್ಲಿಷ್ಟ ಅವು ಸುಖವನ್ನು ಉಂಟುಮಾಡುತ್ತವೆ.
ಅವಿದ್ಯೆ, ಅಸ್ಮಿತ, ರಾಗ, ದ್ವೇಷ ಮತ್ತು ಅಭಿನಿವೇಶ ಇವುಗಳು ಪಂಚಕ್ಲೇಶಗಳು. ಅಂದರೆ ಜೀವಾತ್ಮನಿಗೆ ವ್ಯಥೆಯನ್ನು ಮಾಡುತ್ತವೆ. ಈ ಕ್ಲೇಶಗಳು ಯಾವ ವೃತ್ತಿಗಳನ್ನು ಉತ್ಪತ್ತಿಮಾಡುತ್ತವೆಯೋ ಅಂತಹ ವೃತ್ತಿಗಳು ಕ್ಲಿಷ್ಟ ವೃತ್ತಿಗಳಾಗಿರುತ್ತವೆ.
ಅಕ್ಲಿಷ್ಟ ವೃತ್ತಿಗಳ ಮೂಲಕ ಕ್ಲಿಷ್ಟ ವೃತ್ತಿಗಳನ್ನು ನಿರೋಧಿಸಬೇಕು ಹಾಗೂ ಅಕ್ಲಿಷ್ಟ ವೃತ್ತಿಗಳನ್ನು ವೈರಾಗ್ಯದ ಮೂಲಕ ನಿರೋಧಿಸಬೇಕು.
🙏ಹರಿ ಓಂ🙏